murārikāyakālimālalāmavāridhāriṇī tṛṇīkṛtatriviṣṭapā trilokaśokahāriṇī . mano'nukūlakūlakuñjapuñjadhūtadurmadā dhunotu me manomalaṃ kalindanandinī sadā ..1.. malāpahārivāripūrabhūrimaṇḍitāmṛtā bhṛśaṃ prapātakapravañcanātipaṇḍitāniśam . sunandanandanāṅgasaṅgarāgarañjitā hitā dhunotu me manomalaṃ kalindanandinī sadā ..2.. lasattaraṅgasaṅgadhūtabhūtajātapātakā navīnamādhurīdhurīṇabhaktijātacātakā . taṭāntavāsadāsahaṃsasaṃsṛtā hi kāmadā dhunotu me manomalaṃ kalindanandinī sadā ..3.. vihārarāsakhedabhedadhīratīramārutā gatā girāmagocare yadīyanīracārutā . pravāhasāhacaryapūtamedinīnadīnadā dhunotu me manomalaṃ kalindanandinī sadā ..4.. taraṅgasaṅgasaikatāñcitāntarā sadāsitā śaranniśākarāṃśumañjumañjarīsabhājitā . bhavārcanāya cāruṇāmbunādhunā viśāradā dhunotu me manomalaṃ kalindanandinī sadā ..5.. jalāntakelikāricārurādhikāṅgarāgiṇī svabharturanyadurlabhāṅgasaṅgatāṃśabhāginī svadattasuptasaptasindhubhedanātikovidā . dhunotu me manomalaṃ kalindanandinī sadā ..6.. jalacyutācyutāṅgarāgalampaṭāliśālinī vilolarādhikākacāntacampakālimālinī . sadāvagāhanāvatīrṇabhartṛbhṛtyanāradā dhunotu me manomalaṃ kalindanandinī sadā ..7.. sadaiva nandanandakeliśālikuñjamañjulā taṭotthaphullamallikākadambareṇusūjjvalā jalāvagāhināṃ nṛṇāṃ bhavābdhisindhupāradā dhunotu me manomalaṃ kalindanandinī sadā ..8..

मुरारिकायकालिमाललामवारिधारिणी तृणीकृतत्रिविष्टपा त्रिलोकशोकहारिणी । मनोऽनुकूलकूलकुञ्जपुञ्जधूतदुर्मदा धुनोतु मे मनोमलं कलिन्दनन्दिनी सदा ॥१॥ मलापहारिवारिपूरभूरिमण्डितामृता भृशं प्रपातकप्रवञ्चनातिपण्डितानिशम् । सुनन्दनन्दनाङ्गसङ्गरागरञ्जिता हिता धुनोतु मे मनोमलं कलिन्दनन्दिनी सदा ॥२॥ लसत्तरङ्गसङ्गधूतभूतजातपातका नवीनमाधुरीधुरीणभक्तिजातचातका । तटान्तवासदासहंससंसृता हि कामदा धुनोतु मे मनोमलं कलिन्दनन्दिनी सदा ॥३॥ विहाररासखेदभेदधीरतीरमारुता गता गिरामगोचरे यदीयनीरचारुता । प्रवाहसाहचर्यपूतमेदिनीनदीनदा धुनोतु मे मनोमलं कलिन्दनन्दिनी सदा ॥४॥ तरङ्गसङ्गसैकताञ्चितान्तरा सदासिता शरन्निशाकरांशुमञ्जुमञ्जरीसभाजिता । भवार्चनाय चारुणाम्बुनाधुना विशारदा धुनोतु मे मनोमलं कलिन्दनन्दिनी सदा ॥५॥ जलान्तकेलिकारिचारुराधिकाङ्गरागिणी स्वभर्तुरन्यदुर्लभाङ्गसङ्गतांशभागिनी स्वदत्तसुप्तसप्तसिन्धुभेदनातिकोविदा । धुनोतु मे मनोमलं कलिन्दनन्दिनी सदा ॥६॥ जलच्युताच्युताङ्गरागलम्पटालिशालिनी विलोलराधिकाकचान्तचम्पकालिमालिनी । सदावगाहनावतीर्णभर्तृभृत्यनारदा धुनोतु मे मनोमलं कलिन्दनन्दिनी सदा ॥७॥ सदैव नन्दनन्दकेलिशालिकुञ्जमञ्जुला तटोत्थफुल्लमल्लिकाकदम्बरेणुसूज्ज्वला जलावगाहिनां नृणां भवाब्धिसिन्धुपारदा धुनोतु मे मनोमलं कलिन्दनन्दिनी सदा ॥८॥