oṃ yaśchanda’sāmṛṣabho viśvarū’paḥ | chandobhyo'dhyamṛtā”thsambabhūva’ | sa mendro’ medhayā” spṛṇotu | amṛta’sya devadhāra’ṇo bhūyāsam | śarī’raṃ me vica’rṣaṇam | jihvā me madhu’mattamā | karṇā”bhyāṃ bhūriviśru’vam | brahma’ṇaḥ kośo’'si medhayā pi’hitaḥ | śrutaṃ me’ gopāya ‖ oṃ śāntiḥ śāntiḥ śāntiḥ’ ‖ oṃ medhādevī juṣamā’ṇā na āgā”dviśvācī’ bhadrā su’manasya mā’nā | tvayā juṣṭā’ nudamā’nā duruktā”n bṛhadva’dema vidathe’ suvīrā”ḥ | tvayā juṣṭa’ ṛṣirbha’vati devi tvayā brahmā’''gataśrī’ruta tvayā” | tvayā juṣṭa’ścitraṃ vi’ndate vasu sā no’ juṣasva dravi’ṇo na medhe ‖ medhāṃ ma indro’ dadātu medhāṃ devī sara’svatī | medhāṃ me’ aśvinā’vubhā-vādha’ttāṃ puṣka’rasrajā | apsarāsu’ ca yā medhā gaṃ’dharveṣu’ ca yanmanaḥ’ | daivīṃ” medhā sara’svatī sā māṃ” medhā surabhi’rjuṣatāg svāhā” ‖ āmāṃ” medhā surabhi’rviśvarū’pā hira’ṇyavarṇā jaga’tī jagamyā | ūrja’svatī paya’sā pinva’mānā sā māṃ” medhā supratī’kā juṣantām ‖ mayi’ medhāṃ mayi’ prajāṃ mayyagnistejo’ dadhātu mayi’ medhāṃ mayi’ prajāṃ mayīndra’ iṃdriyaṃ da’dhātu mayi’ medhāṃ mayi’ prajāṃ mayi sūryo bhrājo’ dadhātu ‖ oṃ haṃsa haṃsāya’ vidmahe’ paramahaṃsāya’ dhīmahi | tanno’ haṃsaḥ pracodayā”t ‖ oṃ śāntiḥ śāntiḥ śāntiḥ’ ‖

ॐ यश्छन्द’सामृषभो विश्वरू’पः | छन्दोभ्योऽध्यमृता”थ्सम्बभूव’ | स मेन्द्रो’ मेधया” स्पृणोतु | अमृत’स्य देवधार’णो भूयासम् | शरी’रं मे विच’र्षणम् | जिह्वा मे मधु’मत्तमा | कर्णा”भ्यां भूरिविश्रु’वम् | ब्रह्म’णः कोशो’ऽसि मेधया पि’हितः | श्रुतं मे’ गोपाय ‖ ॐ शान्तिः शान्तिः शान्तिः’ ‖ ॐ मेधादेवी जुषमा’णा न आगा”द्विश्वाची’ भद्रा सु’मनस्य मा’ना | त्वया जुष्टा’ नुदमा’ना दुरुक्ता”न् बृहद्व’देम विदथे’ सुवीरा”ः | त्वया जुष्ट’ ऋषिर्भ’वति देवि त्वया ब्रह्मा’ऽऽगतश्री’रुत त्वया” | त्वया जुष्ट’श्चित्रं वि’न्दते वसु सा नो’ जुषस्व द्रवि’णो न मेधे ‖ मेधां म इन्द्रो’ ददातु मेधां देवी सर’स्वती | मेधां मे’ अश्विना’वुभा-वाध’त्तां पुष्क’रस्रजा | अप्सरासु’ च या मेधा गं’धर्वेषु’ च यन्मनः’ | दैवीं” मेधा सर’स्वती सा मां” मेधा सुरभि’र्जुषताग् स्वाहा” ‖ आमां” मेधा सुरभि’र्विश्वरू’पा हिर’ण्यवर्णा जग’ती जगम्या | ऊर्ज’स्वती पय’सा पिन्व’माना सा मां” मेधा सुप्रती’का जुषन्ताम् ‖ मयि’ मेधां मयि’ प्रजां मय्यग्निस्तेजो’ दधातु मयि’ मेधां मयि’ प्रजां मयीन्द्र’ इंद्रियं द’धातु मयि’ मेधां मयि’ प्रजां मयि सूर्यो भ्राजो’ दधातु ‖ ॐ हंस हंसाय’ विद्महे’ परमहंसाय’ धीमहि | तन्नो’ हंसः प्रचोदया”त् ‖ ॐ शान्तिः शान्तिः शान्तिः’ ‖