vasudeva sutaṃ devaṃ kaṃsacāṇūra mardanam . devakī paramānandaṃ kṛṣṇaṃ vaṃde jagadgurum || 1 || ātasīpuṣpasaṃkāśam hāranūpuraśobhitam ratnakaṇkaṇakeyūraṃ kṛṣṇaṃ vaṃde jagadgurum || 2 || kuṭilālakasaṃyuktaṃ pūrṇacaṃdranibhānanam vilasatkuṇḍaladharaṃ kṛṣṇaṃ vaṃde jagadgurum || 3 || maṃdāragandhasaṃyuktaṃ cāruhāsaṃ caturbhujam barhipiñchāvacūḍāṅgaṃ kṛṣṇaṃ vaṃde jagadgurum || 4 || utphullapadmapatrākṣaṃ nīlajīmūtasannibham yādavānāṃ śiroratnaṃ kṛṣṇaṃ vaṃde jagadgurum || 5 || rukmiṇīkel̤isaṃyuktaṃ pītāṃbarasuśobhitam avāptatulasīgandhaṃ kṛṣṇaṃ vaṃde jagadgurum || 6 || gopikānāṃ kucadvandva kuṃkumāṅkitavakṣasam śrī niketaṃ maheṣvāsaṃ kṛṣṇaṃ vaṃde jagadgurum || 7 || śrīvatsāṅkaṃ mahoraskaṃ vanamālāvirājitam śaṅkhacakradharaṃ devaṃ kṛṣṇaṃ vaṃde jagadgurum || 8 || kṛṣṇāṣṭakamidaṃ puṇyaṃ prātarutthāya yaḥ paṭhet | koṭijanmakṛtaṃ pāpaṃ smaraṇena vinaṣyati ||

वसुदेव सुतं देवं कंसचाणूर मर्दनम् । देवकी परमानन्दं कृष्णं वंदे जगद्गुरुम् || १ || आतसीपुष्पसंकाशम् हारनूपुरशोभितम् रत्नकण्कणकेयूरं कृष्णं वंदे जगद्गुरुम् || २ || कुटिलालकसंयुक्तं पूर्णचंद्रनिभाननम् विलसत्कुण्डलधरं कृष्णं वंदे जगद्गुरुम् || ३ || मंदारगन्धसंयुक्तं चारुहासं चतुर्भुजम् बर्हिपिञ्छावचूडाङ्गं कृष्णं वंदे जगद्गुरुम् || ४ || उत्फुल्लपद्मपत्राक्षं नीलजीमूतसन्निभम् यादवानां शिरोरत्नं कृष्णं वंदे जगद्गुरुम् || ५ || रुक्मिणीकेळिसंयुक्तं पीतांबरसुशोभितम् अवाप्ततुलसीगन्धं कृष्णं वंदे जगद्गुरुम् || ६ || गोपिकानां कुचद्वन्द्व कुंकुमाङ्कितवक्षसम् श्री निकेतं महेष्वासं कृष्णं वंदे जगद्गुरुम् || ७ || श्रीवत्साङ्कं महोरस्कं वनमालाविराजितम् शङ्खचक्रधरं देवं कृष्णं वंदे जगद्गुरुम् || ८ || कृष्णाष्टकमिदं पुण्यं प्रातरुत्थाय यः पठेत् | कोटिजन्मकृतं पापं स्मरणेन विनष्यति ||