śrīguru carana saroja raja nija manu mukuru sudhāri . baranaüm̐ raghubara bimala jasu jo dāyaku phala cāri .. buddhihīna tanu jānike sumirauṃ pavana-kumāra . bala budhi bidyā dehu mohiṃ harahu kalesa bikāra .. ..caupāī.. jaya hanumāna jñāna guna sāgara . jaya kapīsa tihum̐ loka ujāgara ..1.. rāma dūta atulita bala dhāmā . añjani-putra pavanasuta nāmā ..2.. mahābīra bikrama bajaraṅgī . kumati nivāra sumati ke saṅgī ..3.. kañcana barana birāja subesā . kānana kuṇḍala kuñcita kesā ..4.. hātha bajra au dhvajā birājai . kām̐dhe mūm̐ja janeu sājai ..5.. saṅkara suvana kesarīnandana . teja pratāpa mahā jaga bandana ..6.. bidyāvāna gunī ati cātura . rāma kāja karibe ko ātura ..7.. prabhu caritra sunibe ko rasiyā . rāma lakhana sītā mana basiyā ..8.. sūkṣma rūpa dhari siyahiṃ dikhāvā . bikaṭa rūpa dhari laṅka jarāvā ..9.. bhīma rūpa dhari asura sam̐hāre . rāmacandra ke kāja sam̐vāre ..10.. lāya sañjīvana lakhana jiyāye . śrīraghubīra haraṣi ura lāye ..11.. raghupati kīhnī bahuta bar̤āī . tuma mama priya bharatahi sama bhāī ..12.. sahasa badana tuhmāro jasa gāvaiṃ . asa kahi śrīpati kaṇṭha lagāvaiṃ ..13.. sanakādika brahmādi munīsā . nārada sārada sahita ahīsā ..14.. jama kubera digapāla jahām̐ te . kabi kobida kahi sake kahām̐ te ..15.. tuma upakāra sugrīvahiṃ kīhnā . rāma milāya rāja pada dīhnā ..16.. tuhmaro mantra bibhīṣana mānā . laṅkesvara bhae saba jaga jānā ..17.. juga sahasra jojana para bhānu . līlyo tāhi madhura phala jānū ..18.. prabhu mudrikā meli mukha māhīṃ . jaladhi lām̐ghi gaye acaraja nāhīṃ ..19.. durgama kāja jagata ke jete . sugama anugraha tuhmare tete ..20.. rāma duāre tuma rakhavāre . hota na ājñā binu paisāre ..21.. saba sukha lahai tuhmārī saranā . tuma racchaka kāhū ko ḍara nā ..22.. āpana teja sahmāro āpai . tīnoṃ loka hām̐ka teṃ kām̐pai ..23.. bhūta pisāca nikaṭa nahiṃ āvai . mahābīra jaba nāma sunāvai ..24.. nāsai roga harai saba pīrā . japata nirantara hanumata bīrā ..25.. saṅkaṭa teṃ hanumāna chur̤āvai . mana krama bacana dhyāna jo lāvai ..26.. saba para rāma tapasvī rājā . tina ke kāja sakala tuma sājā ..27.. aura manoratha jo koī lāvai . soī amita jīvana phala pāvai ..28.. cāroṃ juga paratāpa tuhmārā . hai parasiddha jagata ujiyārā ..29.. sādhu santa ke tuma rakhavāre . asura nikandana rāma dulāre ..30.. aṣṭasiddhi nau nidhi ke dātā . asa bara dīna jānakī mātā ..31.. rāma rasāyana tuhmare pāsā . sadā raho raghupati ke dāsā ..32.. tuhmare bhajana rāma ko pāvai . janama janama ke dukha bisarāvai ..33.. anta kāla raghubara pura jāī . jahām̐ janma haribhakta kahāī ..34.. aura devatā citta na dharaī . hanumata sei sarba sukha karaī ..35.. saṅkaṭa kaṭai miṭai saba pīrā . jo sumirai hanumata balabīrā ..36.. jaya jaya jaya hanumāna gosāīṃ . kṛpā karahu gurudeva kī nāīṃ ..37.. jo sata bāra pāṭha kara koī . chūṭahi bandi mahā sukha hoī ..38.. jo yaha par̤hai hanumāna cālīsā . hoya siddhi sākhī gaurīsā ..39.. tulasīdāsa sadā hari cerā . kījai nātha hṛdaya maham̐ ḍerā ..40.. ..dohā.. pavanatanaya saṅkaṭa harana maṅgala mūrati rūpa . rāma lakhana sītā sahita hṛdaya basahu sura bhūpa ..

श्रीगुरु चरन सरोज रज निज मनु मुकुरु सुधारि । बरनउँ रघुबर बिमल जसु जो दायकु फल चारि ॥ बुद्धिहीन तनु जानिके सुमिरौं पवन-कुमार । बल बुधि बिद्या देहु मोहिं हरहु कलेस बिकार ॥ ॥चौपाई॥ जय हनुमान ज्ञान गुन सागर । जय कपीस तिहुँ लोक उजागर ॥१॥ राम दूत अतुलित बल धामा । अञ्जनि-पुत्र पवनसुत नामा ॥२॥ महाबीर बिक्रम बजरङ्गी । कुमति निवार सुमति के सङ्गी ॥३॥ कञ्चन बरन बिराज सुबेसा । कानन कुण्डल कुञ्चित केसा ॥४॥ हाथ बज्र औ ध्वजा बिराजै । काँधे मूँज जनेउ साजै ॥५॥ सङ्कर सुवन केसरीनन्दन । तेज प्रताप महा जग बन्दन ॥६॥ बिद्यावान गुनी अति चातुर । राम काज करिबे को आतुर ॥७॥ प्रभु चरित्र सुनिबे को रसिया । राम लखन सीता मन बसिया ॥८॥ सूक्ष्म रूप धरि सियहिं दिखावा । बिकट रूप धरि लङ्क जरावा ॥९॥ भीम रूप धरि असुर सँहारे । रामचन्द्र के काज सँवारे ॥१०॥ लाय सञ्जीवन लखन जियाये । श्रीरघुबीर हरषि उर लाये ॥११॥ रघुपति कीह्नी बहुत बड़ाई । तुम मम प्रिय भरतहि सम भाई ॥१२॥ सहस बदन तुह्मारो जस गावैं । अस कहि श्रीपति कण्ठ लगावैं ॥१३॥ सनकादिक ब्रह्मादि मुनीसा । नारद सारद सहित अहीसा ॥१४॥ जम कुबेर दिगपाल जहाँ ते । कबि कोबिद कहि सके कहाँ ते ॥१५॥ तुम उपकार सुग्रीवहिं कीह्ना । राम मिलाय राज पद दीह्ना ॥१६॥ तुह्मरो मन्त्र बिभीषन माना । लङ्केस्वर भए सब जग जाना ॥१७॥ जुग सहस्र जोजन पर भानु । लील्यो ताहि मधुर फल जानू ॥१८॥ प्रभु मुद्रिका मेलि मुख माहीं । जलधि लाँघि गये अचरज नाहीं ॥१९॥ दुर्गम काज जगत के जेते । सुगम अनुग्रह तुह्मरे तेते ॥२०॥ राम दुआरे तुम रखवारे । होत न आज्ञा बिनु पैसारे ॥२१॥ सब सुख लहै तुह्मारी सरना । तुम रच्छक काहू को डर ना ॥२२॥ आपन तेज सह्मारो आपै । तीनों लोक हाँक तें काँपै ॥२३॥ भूत पिसाच निकट नहिं आवै । महाबीर जब नाम सुनावै ॥२४॥ नासै रोग हरै सब पीरा । जपत निरन्तर हनुमत बीरा ॥२५॥ सङ्कट तें हनुमान छुड़ावै । मन क्रम बचन ध्यान जो लावै ॥२६॥ सब पर राम तपस्वी राजा । तिन के काज सकल तुम साजा ॥२७॥ और मनोरथ जो कोई लावै । सोई अमित जीवन फल पावै ॥२८॥ चारों जुग परताप तुह्मारा । है परसिद्ध जगत उजियारा ॥२९॥ साधु सन्त के तुम रखवारे । असुर निकन्दन राम दुलारे ॥३०॥ अष्टसिद्धि नौ निधि के दाता । अस बर दीन जानकी माता ॥३१॥ राम रसायन तुह्मरे पासा । सदा रहो रघुपति के दासा ॥३२॥ तुह्मरे भजन राम को पावै । जनम जनम के दुख बिसरावै ॥३३॥ अन्त काल रघुबर पुर जाई । जहाँ जन्म हरिभक्त कहाई ॥३४॥ और देवता चित्त न धरई । हनुमत सेइ सर्ब सुख करई ॥३५॥ सङ्कट कटै मिटै सब पीरा । जो सुमिरै हनुमत बलबीरा ॥३६॥ जय जय जय हनुमान गोसाईं । कृपा करहु गुरुदेव की नाईं ॥३७॥ जो सत बार पाठ कर कोई । छूटहि बन्दि महा सुख होई ॥३८॥ जो यह पढ़ै हनुमान चालीसा । होय सिद्धि साखी गौरीसा ॥३९॥ तुलसीदास सदा हरि चेरा । कीजै नाथ हृदय महँ डेरा ॥४०॥ ॥दोहा॥ पवनतनय सङ्कट हरन मङ्गल मूरति रूप । राम लखन सीता सहित हृदय बसहु सुर भूप ॥