ṣaḍādhārapaṅkeruhāntarvirājat suṣumnāntarāle'titejollasantīm . sudhāmaṇḍalaṃ drāvayantīṃ pibantīṃ sudhāmūrtimīḍe'cidānandarūpām .. 1.. jvalatkoṭibālārkabhāsāruṇāṅgīṃ sulāvaṇyaśṛṅgāraśobhābhirāmām . mahāpadmakiñjalkamadhye virājat trikoṇe niṣaṇṇāṃ ṃ bhaje śrībhavānīm ..2.. kvaṇatkiṅkiṇīnūpurodbhāsiratna prabhālīḍhalākṣārdrapādābjayugmam . ajeśācyutādyaiḥ suraiḥ sevyamānaṃ mahādevi manmūrdhni te bhāvayāmi .. 3.. suṣoṇāmbarābaddhanīvīvirājan mahāratnakāñcīkalāpaṃ nitambam . sphuraddakṣiṇāvartanābhiṃ ca tisro valī ramyate romarājiṃ bhaje'ham .. 4.. lasadvṛttamuttuṅgamāṇikyakumbho- pamaśrīstanadvandvamambāṃbujākṣīm . bhaje dugdha pūrṇābhirāmaṃ tavedaṃ mahāhāradīptaṃ sadā prasnutāsyam .. 5.. śirīṣaprasūnollasadbāhudaṇḍair- jvaladbāṇakodaṇḍapāśāṅkuśaiśca . calatkaṅkaṇodārakeyūrabhūṣā jvaladbhiḥ lasantīṃ bhaje śrībhavānīm .. 6.. śaratpūrṇacandraprabhāpūrṇabimbā dharasmeravaktrāravindaṃ suśaṃtām. suratnāvalīhāratāṭaṅkaśobhā mahā suprasannāṃ bhaje śrībhavānīm .. 7.. sunāsāpuṭaṃ padmapatrāyatākṣaṃ yajantaḥ śriyaṃ dānadakṣaṃ kaṭākṣam . lalāṭollasadgandhakastūribhūṣo- jjvaladbhiḥ sphurantīṃ bhaje śrībhavānīm .. 8.. calatkuṇḍalāṃ te bhramadbhṛṅgavṛndāṃ ghanasnigdhadhammillabhūṣojjvalantīm . sphuranmaulimāṇikyamadhyendurekhā vilāsollasaddivyamūrdhānamīḍe .. 9.. sphuratvamba bimbasya me hṛtsaroje sadā vāṅmayaṃ sarvatejomayaṃ ca . iti śrībhavānisvarūpaṃ tadevaṃ prapañcātparaṃ cātisūkṣmaṃ prasannam .. 10.. gaṇeśāṇimādyākhilaiḥ śaktivṛndai- rsphuracchrīmahācakrarājollasantīm . parāṃ rājarājeśvarīṃ tvā bhavānīṃ śivāṅkoparisthāṃ śivāṃ bhāvaye'ham .. 11.. tvamarkastvamagnistvamindustvamāpa- stvamākāśabhūrvāyavastvaṃ cidātmā . tvadanyo na kaścitprakāśo'sti sarvaṃ sadānandasaṃvitsvarūpaṃ tavedam .. 12.. gurustvaṃ śivastvaṃ ca śaktistvameva tvamevāsi mātā pitā'si tvameva . tvamevāsi vidyā tvamevāsi buddhi- rgatirme matirdevi sarvaṃ tvameva .. 13.. śrutīnāmagamyaṃ suvedāgamādyair- mahimno na jānāti pāraṃ tavedam . stutiṃ kartumicchāmi te tvaṃ bhavāni kṣamasvedamamba pramugdhaḥ kilāham .. 14.. śaraṇye vareṇye sukāruṇyapūrṇe hiraṇyodarādyairagamye'tipuṇye . bhavāraṇyabhītaṃ ca māṃ pāhi bhadre namaste namaste namaste bhavāni .. 15.. imāmanvahaṃ śrībhavānībhujaṅga- stutiryaḥ paṭhecchrotumiccheta tasmai . svakīyaṃ padaṃ śāśvataṃ caiva sāraṃ śriyaṃ cāṣṭasiddhiṃ bhavānī dadāti .. 16.. bhavānī bhavānī bhavānī trivāram- udāram mudā sarvadā ye japanti . na śokam na moham na pāpaṃ na bhītiḥ kadācitkathaṃcitkutaścajjanānām .. 17.. iti śrīmacchaṅkarācāryaviracitaṃ bhavānībhujaṅgaprayātastotraṃ sampūrṇam ..

षडाधारपङ्केरुहान्तर्विराजत् सुषुम्नान्तरालेऽतितेजोल्लसन्तीम् । सुधामण्डलं द्रावयन्तीं पिबन्तीं सुधामूर्तिमीडेऽचिदानन्दरूपाम् ॥ १॥ ज्वलत्कोटिबालार्कभासारुणाङ्गीं सुलावण्यशृङ्गारशोभाभिरामाम् । महापद्मकिञ्जल्कमध्ये विराजत् त्रिकोणे निषण्णां ं भजे श्रीभवानीम् ॥२॥ क्वणत्किङ्किणीनूपुरोद्भासिरत्न प्रभालीढलाक्षार्द्रपादाब्जयुग्मम् । अजेशाच्युताद्यैः सुरैः सेव्यमानं महादेवि मन्मूर्ध्नि ते भावयामि ॥ ३॥ सुषोणाम्बराबद्धनीवीविराजन् महारत्नकाञ्चीकलापं नितम्बम् । स्फुरद्दक्षिणावर्तनाभिं च तिस्रो वली रम्यते रोमराजिं भजेऽहम् ॥ ४॥ लसद्वृत्तमुत्तुङ्गमाणिक्यकुम्भो- पमश्रीस्तनद्वन्द्वमम्बांबुजाक्षीम् । भजे दुग्ध पूर्णाभिरामं तवेदं महाहारदीप्तं सदा प्रस्नुतास्यम् ॥ ५॥ शिरीषप्रसूनोल्लसद्बाहुदण्डैर्- ज्वलद्बाणकोदण्डपाशाङ्कुशैश्च । चलत्कङ्कणोदारकेयूरभूषा ज्वलद्भिः लसन्तीं भजे श्रीभवानीम् ॥ ६॥ शरत्पूर्णचन्द्रप्रभापूर्णबिम्बा धरस्मेरवक्त्रारविन्दं सुशंताम्। सुरत्नावलीहारताटङ्कशोभा महा सुप्रसन्नां भजे श्रीभवानीम् ॥ ७॥ सुनासापुटं पद्मपत्रायताक्षं यजन्तः श्रियं दानदक्षं कटाक्षम् । ललाटोल्लसद्गन्धकस्तूरिभूषो- ज्ज्वलद्भिः स्फुरन्तीं भजे श्रीभवानीम् ॥ ८॥ चलत्कुण्डलां ते भ्रमद्भृङ्गवृन्दां घनस्निग्धधम्मिल्लभूषोज्ज्वलन्तीम् । स्फुरन्मौलिमाणिक्यमध्येन्दुरेखा विलासोल्लसद्दिव्यमूर्धानमीडे ॥ ९॥ स्फुरत्वम्ब बिम्बस्य मे हृत्सरोजे सदा वाङ्मयं सर्वतेजोमयं च । इति श्रीभवानिस्वरूपं तदेवं प्रपञ्चात्परं चातिसूक्ष्मं प्रसन्नम् ॥ १०॥ गणेशाणिमाद्याखिलैः शक्तिवृन्दै- र्स्फुरच्छ्रीमहाचक्रराजोल्लसन्तीम् । परां राजराजेश्वरीं त्वा भवानीं शिवाङ्कोपरिस्थां शिवां भावयेऽहम् ॥ ११॥ त्वमर्कस्त्वमग्निस्त्वमिन्दुस्त्वमाप- स्त्वमाकाशभूर्वायवस्त्वं चिदात्मा । त्वदन्यो न कश्चित्प्रकाशोऽस्ति सर्वं सदानन्दसंवित्स्वरूपं तवेदम् ॥ १२॥ गुरुस्त्वं शिवस्त्वं च शक्तिस्त्वमेव त्वमेवासि माता पिताऽसि त्वमेव । त्वमेवासि विद्या त्वमेवासि बुद्धि- र्गतिर्मे मतिर्देवि सर्वं त्वमेव ॥ १३॥ श्रुतीनामगम्यं सुवेदागमाद्यैर्- महिम्नो न जानाति पारं तवेदम् । स्तुतिं कर्तुमिच्छामि ते त्वं भवानि क्षमस्वेदमम्ब प्रमुग्धः किलाहम् ॥ १४॥ शरण्ये वरेण्ये सुकारुण्यपूर्णे हिरण्योदराद्यैरगम्येऽतिपुण्ये । भवारण्यभीतं च मां पाहि भद्रे नमस्ते नमस्ते नमस्ते भवानि ॥ १५॥ इमामन्वहं श्रीभवानीभुजङ्ग- स्तुतिर्यः पठेच्छ्रोतुमिच्छेत तस्मै । स्वकीयं पदं शाश्वतं चैव सारं श्रियं चाष्टसिद्धिं भवानी ददाति ॥ १६॥ भवानी भवानी भवानी त्रिवारम्- उदारम् मुदा सर्वदा ये जपन्ति । न शोकम् न मोहम् न पापं न भीतिः कदाचित्कथंचित्कुतश्चज्जनानाम् ॥ १७॥ इति श्रीमच्छङ्कराचार्यविरचितं भवानीभुजङ्गप्रयातस्तोत्रं सम्पूर्णम् ॥