āpo hi ṣṭhā mayobhuvasthā na ūrje dadhātana . mahe raṇātha cakṣase ..1.. yo vaḥ śivatamo rasastasya bhājayateha naḥ . uśatīriva mātaraḥ ..2.. tasmā araṃ gamāma vo yasya kṣayāya jinvatha . āpo janayathā ca naḥ ..3.. śaṃ no devīrabhiṣṭaya āpo bhavantu pītaye . śaṃ yorabhi sravantu naḥ ..4.. īśānā vāryāṇāṃ kṣayantīścarṣaṇīnām . apo yācāmi bheṣajam ..5.. apsu me somo abravīdantarviśvāni bheṣajā . agni ca viśvaśaṃbhuvam ..6.. āpaḥ pṛṇīta bheṣajaṃ varūthaṃ tanve' mama . jyokca sūryaṃ dṛśe ..7.. idamāpaḥ pra vahata yatkiṃ ca duritaṃ mayi . yadvāhamabhidudroha yadvā śepa utānṛtam ..8.. āpo adyānvacāriṣaṃ rasena samagasmahi . payasvānagna ā gahi taṃ mā saṃ sṛja varcasā ..9..

आपो हि ष्ठा मयोभुवस्था न ऊर्जे दधातन । महे रणाथ चक्षसे ॥१॥ यो वः शिवतमो रसस्तस्य भाजयतेह नः । उशतीरिव मातरः ॥२॥ तस्मा अरं गमाम वो यस्य क्षयाय जिन्वथ । आपो जनयथा च नः ॥३॥ शं नो देवीरभिष्टय आपो भवन्तु पीतये । शं योरभि स्रवन्तु नः ॥४॥ ईशाना वार्याणां क्षयन्तीश्चर्षणीनाम् । अपो याचामि भेषजम् ॥५॥ अप्सु मे सोमो अब्रवीदन्तर्विश्वानि भेषजा । अग्नि च विश्वशंभुवम् ॥६॥ आपः पृणीत भेषजं वरूथं तन्वेऽ मम । ज्योक्च सूर्यं दृशे ॥७॥ इदमापः प्र वहत यत्किं च दुरितं मयि । यद्वाहमभिदुद्रोह यद्वा शेप उतानृतम् ॥८॥ आपो अद्यान्वचारिषं रसेन समगस्महि । पयस्वानग्न आ गहि तं मा सं सृज वर्चसा ॥९॥