tasmai namaḥ paramakāraṇakāraṇāya dīptojjvalajjvalitapiṅgalalocanāya . nāgendrahārakṛtakuṇḍalabhūṣaṇāya brahmendraviṣṇuvaradāya namaḥ śivāya ..1.. śrīmatprasannaśaśipannagabhūṣaṇāya śailendrajāvadanacumbitalocanāya . kailāsamandaramahendraniketanāya lokatrayārtiharaṇāya namaḥ śivāya ..2.. padmāvadātamaṇikuṇḍalagovṛṣāya kṛṣṇāgarupracuracandanacarcitāya . bhasmānuṣaktavikacotpalamallikāya nīlābjakaṇṭhasadṛśāya namaḥ śivāya ..3.. lambatsapiṅgalajaṭāmukuṭotkaṭāya daṃṣṭrākarālavikaṭotkaṭabhairavāya . vyāghrājināmbaradharāya manoharāya trailokyanāthanamitāya namaḥ śivāya ..4.. dakṣaprajāpatimahāmakhanāśanāya kṣipraṃ mahātripuradānavaghātanāya . brahmorjitordhvagakaroṭinikṛntanāya yogāya yoganamitāya namaḥ śivāya ..5.. saṃsārasṛṣṭighaṭanāparivartanāya rakṣaḥ piśācagaṇasiddhasamākulāya . siddhoragagrahagaṇendraniṣevitāya śārdūlacarmavasanāya namaḥ śivāya ..6.. bhasmāṅgarāgakṛtarūpamanoharāya saumyāvadātavanamāśritamāśritāya . gaurīkaṭākṣanayanārdhanirīkṣanāya gokṣīradhāradhavalāya namaḥ śivāya ..7.. ādityasomavaruṇānilasevitāya yajñāgnihotravaradhūmaniketanāya . ṛksāmavedamunibhiḥ stutisaṃyutāya gopāya gopanamitāya namaḥ śivāya ..8.. śivāṣṭakamidaṃ puṇyaṃ yaḥ paṭhecchivasannidhau . śivalokamavāpnoti śivena saha modate ..9..

तस्मै नमः परमकारणकारणाय दीप्तोज्ज्वलज्ज्वलितपिङ्गललोचनाय । नागेन्द्रहारकृतकुण्डलभूषणाय ब्रह्मेन्द्रविष्णुवरदाय नमः शिवाय ॥१॥ श्रीमत्प्रसन्नशशिपन्नगभूषणाय शैलेन्द्रजावदनचुम्बितलोचनाय । कैलासमन्दरमहेन्द्रनिकेतनाय लोकत्रयार्तिहरणाय नमः शिवाय ॥२॥ पद्मावदातमणिकुण्डलगोवृषाय कृष्णागरुप्रचुरचन्दनचर्चिताय । भस्मानुषक्तविकचोत्पलमल्लिकाय नीलाब्जकण्ठसदृशाय नमः शिवाय ॥३॥ लम्बत्सपिङ्गलजटामुकुटोत्कटाय दंष्ट्राकरालविकटोत्कटभैरवाय । व्याघ्राजिनाम्बरधराय मनोहराय त्रैलोक्यनाथनमिताय नमः शिवाय ॥४॥ दक्षप्रजापतिमहामखनाशनाय क्षिप्रं महात्रिपुरदानवघातनाय । ब्रह्मोर्जितोर्ध्वगकरोटिनिकृन्तनाय योगाय योगनमिताय नमः शिवाय ॥५॥ संसारसृष्टिघटनापरिवर्तनाय रक्षः पिशाचगणसिद्धसमाकुलाय । सिद्धोरगग्रहगणेन्द्रनिषेविताय शार्दूलचर्मवसनाय नमः शिवाय ॥६॥ भस्माङ्गरागकृतरूपमनोहराय सौम्यावदातवनमाश्रितमाश्रिताय । गौरीकटाक्षनयनार्धनिरीक्षनाय गोक्षीरधारधवलाय नमः शिवाय ॥७॥ आदित्यसोमवरुणानिलसेविताय यज्ञाग्निहोत्रवरधूमनिकेतनाय । ऋक्सामवेदमुनिभिः स्तुतिसंयुताय गोपाय गोपनमिताय नमः शिवाय ॥८॥ शिवाष्टकमिदं पुण्यं यः पठेच्छिवसन्निधौ । शिवलोकमवाप्नोति शिवेन सह मोदते ॥९॥