candraśekhara candraśekhara candraśekhara pāhi mām . candraśekhara candraśekhara candraśekhara rakṣa mām .. 1.. ratnasānuśarāsanaṃ rajatādriśṛṅganiketanaṃ siñjinīkṛta pannageśvaramacyutānanasāyakam . kṣipradagdhapuratrayaṃ tridivālayairabhivanditaṃ candraśekharamāśraye mama kiṃ kariṣyati vai yamaḥ .. 2.. pañcapādapa puṣpagandha padāmbujadvayaśobhitaṃ bhālalocana jātapāvaka dagdhamanmatha vigraham . bhasmadigdhakalevaraṃ bhavanāśanaṃ bhavamavyayaṃ candraśekharamāśraye mama kiṃ kariṣyati vai yamaḥ .. 3.. mattavāraṇa mukhyacarmakṛtottarīya manoharaṃ paṅkajāsana padmalocana pūjitāṅghri saroruham . devasindhutaraṅgasīkara siktaśubhrajaṭādharaṃ candraśekharamāśraye mama kiṃ kariṣyati vai yamaḥ .. 4.. yakṣarājasakhaṃ bhagākṣaharaṃ bhujaṅgavibhūṣaṇaṃ śailarājasutāpariṣkṛta cāruvāmakalevaram . kṣveḍanīlagalaṃ paraśvadhadhāriṇaṃ mṛgadhāriṇaṃ candraśekharamāśraye mama kiṃ kariṣyati vai yamaḥ .. 5.. kuṇḍalīkṛta kuṇḍaleśvara kuṇḍalaṃ vṛṣavāhanaṃ nāradādi munīśvarastuta vaibhavaṃ bhuvaneśvaram . andhakāndhakāmāśritāmarapādapaṃ śamanāntakaṃ candraśekharamāśraye mama kiṃ kariṣyati vai yamaḥ .. 6.. bheṣajaṃ bhavarogiṇāmakhilāpadāmapahāriṇaṃ dakṣayajñavināśanaṃ triguṇātmakaṃ trivilocanam . bhuktimuktiphalapradaṃ sakalāghasaṅghanibarhaṇaṃ candraśekharamāśraye mama kiṃ kariṣyati vai yamaḥ .. 7.. bhaktavatsalamarcitaṃ nidhimakṣayaṃ haridambaraṃ sarvabhūtapatiṃ parātparamaprameyamanuttamam . somavārida bhūhutāśana somapānilakhākṛtiṃ candraśekharamāśraye mama kiṃ kariṣyati vai yamaḥ .. 8.. viśvasṛṣṭi vidhāyinaṃ punareva pālanatatparaṃ saṃharantamapi prapañcamaśeṣa lokanivāsinam . krīḍayanta maharniśaṃ gaṇanāthayūtha samanvitaṃ candraśekharamāśraye mama kiṃ kariṣyati vai yamaḥ .. 9.. mṛtyubhītamṛkaṇḍasūnu kṛtastavaṃ śivasannidhau yatra kutra ca yaḥ paṭhenna hi tasya mṛtyubhayaṃ bhavet . pūrṇamāyura rogitāmakhilārthasampadamādaraṃ candraśekhara eva tasya dadāti muktimayatnataḥ .. 10..

चन्द्रशेखर चन्द्रशेखर चन्द्रशेखर पाहि माम् । चन्द्रशेखर चन्द्रशेखर चन्द्रशेखर रक्ष माम् ॥ १॥ रत्नसानुशरासनं रजताद्रिशृङ्गनिकेतनं सिञ्जिनीकृत पन्नगेश्वरमच्युताननसायकम् । क्षिप्रदग्धपुरत्रयं त्रिदिवालयैरभिवन्दितं चन्द्रशेखरमाश्रये मम किं करिष्यति वै यमः ॥ २॥ पञ्चपादप पुष्पगन्ध पदाम्बुजद्वयशोभितं भाललोचन जातपावक दग्धमन्मथ विग्रहम् । भस्मदिग्धकलेवरं भवनाशनं भवमव्ययं चन्द्रशेखरमाश्रये मम किं करिष्यति वै यमः ॥ ३॥ मत्तवारण मुख्यचर्मकृतोत्तरीय मनोहरं पङ्कजासन पद्मलोचन पूजिताङ्घ्रि सरोरुहम् । देवसिन्धुतरङ्गसीकर सिक्तशुभ्रजटाधरं चन्द्रशेखरमाश्रये मम किं करिष्यति वै यमः ॥ ४॥ यक्षराजसखं भगाक्षहरं भुजङ्गविभूषणं शैलराजसुतापरिष्कृत चारुवामकलेवरम् । क्ष्वेडनीलगलं परश्वधधारिणं मृगधारिणं चन्द्रशेखरमाश्रये मम किं करिष्यति वै यमः ॥ ५॥ कुण्डलीकृत कुण्डलेश्वर कुण्डलं वृषवाहनं नारदादि मुनीश्वरस्तुत वैभवं भुवनेश्वरम् । अन्धकान्धकामाश्रितामरपादपं शमनान्तकं चन्द्रशेखरमाश्रये मम किं करिष्यति वै यमः ॥ ६॥ भेषजं भवरोगिणामखिलापदामपहारिणं दक्षयज्ञविनाशनं त्रिगुणात्मकं त्रिविलोचनम् । भुक्तिमुक्तिफलप्रदं सकलाघसङ्घनिबर्हणं चन्द्रशेखरमाश्रये मम किं करिष्यति वै यमः ॥ ७॥ भक्तवत्सलमर्चितं निधिमक्षयं हरिदम्बरं सर्वभूतपतिं परात्परमप्रमेयमनुत्तमम् । सोमवारिद भूहुताशन सोमपानिलखाकृतिं चन्द्रशेखरमाश्रये मम किं करिष्यति वै यमः ॥ ८॥ विश्वसृष्टि विधायिनं पुनरेव पालनतत्परं संहरन्तमपि प्रपञ्चमशेष लोकनिवासिनम् । क्रीडयन्त महर्निशं गणनाथयूथ समन्वितं चन्द्रशेखरमाश्रये मम किं करिष्यति वै यमः ॥ ९॥ मृत्युभीतमृकण्डसूनु कृतस्तवं शिवसन्निधौ यत्र कुत्र च यः पठेन्न हि तस्य मृत्युभयं भवेत् । पूर्णमायुर रोगितामखिलार्थसम्पदमादरं चन्द्रशेखर एव तस्य ददाति मुक्तिमयत्नतः ॥ १०॥