Related works: Saddarshanam – Telugu Ulladu Narpadu Ulladu Narpadu with Explanations Ulladu Narpadu Anubandham Ulladu Narpadu Anubandham with Explanations Ulladu Narpadu Kalivenba Complete works of Bhagavan Ramana Maharshi maṅgalam satpratyayāḥ kiṃ nu vihāya santaṃ hṛdyeṣa cintārahito hṛdākhyaḥ kathaṃ smarāmastamameyamekaṃ tasya smṛtistatra dṛḍhaiva niṣṭhā 1 mṛtyuñjayaṃ mṛtyubhiyāśritānā- mahaṃmatirmṛtyumupaiti pūrvam atha svabhāvādamṛteṣu teṣu kathaṃ punarmṛtyudhiyo'vakāśaḥ 2 granthārambhaḥ sarvairnidānaṃ jagato'hamaśca vācyaḥ prabhuḥ kaścidapāraśaktiḥ citre'tra lokyaṃ ca vilokitā ca paṭaḥ prakāśo'pyabhavatsa ekaḥ 1 tattvagranthamālā ārabhyate jīvajagatparātma- tattvābhidhānena mataṃ samastam idaṃ trayaṃ yāvadahaṃmati syāt sarvottamā'haṃmatiśūnyaniṣṭhā 2 satyaṃ mṛṣā vā cididaṃ jaḍaṃ vā duḥkhaṃ sukhaṃ veti mudhā vivādaḥ adṛṣṭalokā nirahaṃpratīti- rniṣṭhā'vikalpā paramā'khileṣṭā 3 sarūpabuddhirjagatīśvare ca sarūpadhīrātmani yāvadasti arūpakātmā yadi kaḥ prapaśyet sā dṛṣṭirekā'navadhirhi pūrṇā 4 yatpañcakośātmakamasti dehaṃ tadantarā kiṃ bhuvanaṃ cakāsti dehaṃ vinā pañcavidhaṃ tadetat paśyanti ke vā bhuvanaṃ bhaṇantu 5 śabdādirūpaṃ bhuvanaṃ samastaṃ śabdādisattendriyavṛttibhāsyā sattendriyāṇāṃ manaso vaśe syāt manomayaṃ tadbhuvanaṃ vadāmaḥ 6 dhiyā sahodeti dhiyāstameti lokastato dhīpravibhāsya eṣaḥ dhīlokajanmakṣayadhāma pūrṇaṃ sadvastu janmakṣayaśūnyamekam 7 bhavantu saddarśanasādhanāni parasya nāmākṛtibhiḥ saparyā sadvastuni prāptatadātmabhāvā niṣṭhaiva saddarśanamityavehi 8 dvandvāni sarvāṇyakhilāstripuṭyaḥ kiñcitsamāśritya vibhānti vastu tanmārgaṇe syādgalitaṃ samastaṃ na paśyatāṃ saccalanaṃ kadāpi 9 vidyā kathaṃ bhāti na cedavidyā vidyāṃ vinā kiṃ pravibhātyavidyā dvayaṃ ca kasyeti vicārya mūla- svarūpaniṣṭhā paramārthavidyā 10 boddhāramātmānamajānato yo bodhaḥ sa kiṃ syātparamārthabodhaḥ bodhasya bodhyasya ca saṃśrayaṃ svaṃ vijānatastaddvitayaṃ vinaśyet 11 nidrā na vidyā grahaṇaṃ na vidyā gṛhṇāti kiñcinna yathārthabodhe nidrāpadārthagrahaṇetarā syāt cideva vidyā vilasantyaśūnyā 12 satyaścidātmā vividhākṛtiścit sidhyetpṛthaksatyacito na bhinnā bhūṣāvikārāḥ kimu santi satyaṃ vinā suvarṇaṃ pṛthagatra loke 13 tadyuṣmadorasmadi sampratiṣṭhā tasmin vinaṣṭe'smadi mūlabodhāt tadyuṣmadasmanmativarjitaikā sthitirjvalantī sahajātmanaḥ syāt 14 bhūtaṃ bhaviṣyacca bhavatsvakāle tadvartamānasya vihāya tattvam hāsyā na kiṃ syādgatabhāvicarcā vinaikasaṅkhyāṃ gaṇaneva loke 15 kva bhāti dikkālakathā vinā'smān dikkālalīleha vapurvayaṃ cet na kvāpi bhāmo na kadāpi bhāmo vayaṃ tu sarvatra sadā ca bhāmaḥ 16 dehātmabhāve jñajaḍau samānā- vekasya dehe hṛdi dīpta ātmā ākramya dehaṃ ca jagacca pūrṇaḥ parasya meyaṃ tanumātramātmā 17 ajñasya vijñasya ca viśvamasti pūrvasya dṛśyaṃ jagadeva satyam parasya dṛśyāśrayabhūtamekaṃ satyaṃ prapūrṇaṃ pravibhātyarūpam 18 vidheḥ prayatnasya ca ko'pi vāda- stayordvayormūlamajānatāṃ syāt vidheḥ prayatnasya ca mūlavastu sañjānatāṃ naiva vidhirna yatnaḥ 19 yadīśiturvīkṣaṇamīkṣitāra- mavīkṣya tanmānasikekṣaṇaṃ syāt na draṣṭuranyaḥ paramo hi tasya vīkṣā svamūle pravilīya niṣṭhā 20 ātmānamīkṣeta paraṃ prapaśye- dityāgamokteḥ sulabho na bhāvaḥ nātmaiva dṛśyo yadi kā katheśe svayaṃ tadannībhavanaṃ tadīkṣā 21 dhiye prakāśaṃ paramo vitīrya svayaṃ dhiyo'ntaḥ pravibhāti guptaḥ dhiyaṃ parāvartya dhiyontare'tra saṃyojanānneśvaradṛṣṭiranyā 22 na vakti deho'hamiti prasuptau na ko'pi nābhūvamiti pravakti yatrodite sarvamudeti tasya dhiyā'hamaḥ śodhaya janmadeśam 23 deho na jānāti sato na janma dehapramāṇo'nya udeti madhye ahaṅkṛtigranthivibandhasūkṣma- śarīracetobhavajīvanāmā 24 rūpodbhavo rūpatatipratiṣṭho rūpāśano dhūtagṛhītarūpaḥ svayaṃ virūpaḥ svavicārakāle dhāvatyahaṅkārapiśāca eṣaḥ 25 bhāve'hamaḥ sarvamidaṃ vibhāti laye'hamo naiva vibhāti kiñcit tasmādahaṃrūpamidaṃ samastaṃ tanmārgaṇaṃ sarvajayāya mārgaḥ 26 satyā sthitirnāhamudeti yatra taccodayasthānagaveṣaṇena vinā na naśyedyadi tanna naśyet svātmaikyarūpā kathamastu niṣṭhā 27 kūpe yathā gāḍhajale tathānta- rnimajjya buddhyā śitayā nitāntam prāṇaṃ ca vācaṃ ca niyamya cinvan vindennijāhaṅkṛtimūlarūpam 28 maunena majjanmanasā svamūla- carcaiva satyātmavicāraṇaṃ syāt eṣo'hametanna mama svarūpa- miti pramā satyavicāraṇāṅgam 29 gaveṣaṇātprāpya hṛdantaraṃ tat patedahantā paribhugnaśīrṣā athāhamanyatsphurati prakṛṣṭaṃ nāhaṅkṛtistatparameva pūrṇam 30 ahaṅkṛtiṃ yo lasati grasitvā kiṃ tasya kāryaṃ pariśiṣṭamasti kiñcidvijānāti sa nātmano'nyat tasya sthitiṃ bhāvayituṃ kṣamaḥ kaḥ 31 āha sphuṭaṃ tattvamasīti veda- stathāpyasamprāpya parātmaniṣṭhām bhūyo vicāro matidurbalatvaṃ tatsarvadā svātmatayā hi bhāti 32 na vedmyahaṃ māmuta vedmyahaṃ mā- miti pravādo manujasya hāsyaḥ dṛgdṛśyabhedāt kimayaṃ dvidhātmā svātmaikatāyāṃ hi dhiyāṃ na bhedāḥ 33 hṛtprāpya saddhāma nijasvarūpe svabhāvasiddhe'nupalabhya niṣṭhām māyāvilāsaḥ sadasatsarūpa- virūpanānaikamukhapravādāḥ 34 siddhasya vittiḥ sata eva siddhiḥ svapnopamānāḥ khalu siddhayo'nyāḥ svapnaḥ prabuddhasya kathaṃ nu satyaḥ sati sthitaḥ kiṃ punareti māyām 35 so'haṃvicāro vapurātmabhāve sāhāyyakārī paramārgaṇasya svātmaikyasiddhau sa punarnirartho yathā naratvapramitirnarasya 36 dvaitaṃ vicāre paramārthabodhe tvadvaitamityeṣa na sādhuvādaḥ gaveṣaṇātprāgdaśame vinaṣṭe paścācca labdhe daśamatvamekam 37 karomi karmeti naro vijānan bādhyo bhavetkarmaphalaṃ ca bhoktum vicāradhūtā hṛdi kartṛtā cet karmatrayaṃ naśyati saiva muktiḥ 38 baddhatvabhāve sati mokṣacintā bandhastu kasyeti vicāraṇena siddhe svayaṃ svātmani nityamukte kva bandhacintā kva ca mokṣacintā 39 rūpiṇyarūpiṇyubhayātmikā ca muktistrirūpeti vido vadanti idaṃ trayaṃ yā vivinaktyahandhī- stasyāḥ praṇāśaḥ paramārthamuktiḥ 40 saddarśanaṃ drāviḍavāṅnibaddhaṃ maharṣiṇā śrīramaṇena śuddham prabandhamutkṛṣṭamamartyavāṇyā- manūdya vāsiṣṭhamunirvyatānīt 41 sattattvasāraṃ saralaṃ dadhānā mumukṣulokāya mudaṃ dadānā amānuṣaśrīramaṇīyavāṇī- mayūkhabhittirmunivāg vibhāti 42

Related works: Saddarshanam – Telugu Ulladu Narpadu Ulladu Narpadu with Explanations Ulladu Narpadu Anubandham Ulladu Narpadu Anubandham with Explanations Ulladu Narpadu Kalivenba Complete works of Bhagavan Ramana Maharshi मङ्गलम् सत्प्रत्ययाः किं नु विहाय सन्तं हृद्येष चिन्तारहितो हृदाख्यः कथं स्मरामस्तममेयमेकं तस्य स्मृतिस्तत्र दृढैव निष्ठा 1 मृत्युञ्जयं मृत्युभियाश्रिताना- महंमतिर्मृत्युमुपैति पूर्वम् अथ स्वभावादमृतेषु तेषु कथं पुनर्मृत्युधियोऽवकाशः 2 ग्रन्थारम्भः सर्वैर्निदानं जगतोऽहमश्च वाच्यः प्रभुः कश्चिदपारशक्तिः चित्रेऽत्र लोक्यं च विलोकिता च पटः प्रकाशोऽप्यभवत्स एकः 1 तत्त्वग्रन्थमाला आरभ्यते जीवजगत्परात्म- तत्त्वाभिधानेन मतं समस्तम् इदं त्रयं यावदहंमति स्यात् सर्वोत्तमाऽहंमतिशून्यनिष्ठा 2 सत्यं मृषा वा चिदिदं जडं वा दुःखं सुखं वेति मुधा विवादः अदृष्टलोका निरहंप्रतीति- र्निष्ठाऽविकल्पा परमाऽखिलेष्टा 3 सरूपबुद्धिर्जगतीश्वरे च सरूपधीरात्मनि यावदस्ति अरूपकात्मा यदि कः प्रपश्येत् सा दृष्टिरेकाऽनवधिर्हि पूर्णा 4 यत्पञ्चकोशात्मकमस्ति देहं तदन्तरा किं भुवनं चकास्ति देहं विना पञ्चविधं तदेतत् पश्यन्ति के वा भुवनं भणन्तु 5 शब्दादिरूपं भुवनं समस्तं शब्दादिसत्तेन्द्रियवृत्तिभास्या सत्तेन्द्रियाणां मनसो वशे स्यात् मनोमयं तद्भुवनं वदामः 6 धिया सहोदेति धियास्तमेति लोकस्ततो धीप्रविभास्य एषः धीलोकजन्मक्षयधाम पूर्णं सद्वस्तु जन्मक्षयशून्यमेकम् 7 भवन्तु सद्दर्शनसाधनानि परस्य नामाकृतिभिः सपर्या सद्वस्तुनि प्राप्ततदात्मभावा निष्ठैव सद्दर्शनमित्यवेहि 8 द्वन्द्वानि सर्वाण्यखिलास्त्रिपुट्यः किञ्चित्समाश्रित्य विभान्ति वस्तु तन्मार्गणे स्याद्गलितं समस्तं न पश्यतां सच्चलनं कदापि 9 विद्या कथं भाति न चेदविद्या विद्यां विना किं प्रविभात्यविद्या द्वयं च कस्येति विचार्य मूल- स्वरूपनिष्ठा परमार्थविद्या 10 बोद्धारमात्मानमजानतो यो बोधः स किं स्यात्परमार्थबोधः बोधस्य बोध्यस्य च संश्रयं स्वं विजानतस्तद्द्वितयं विनश्येत् 11 निद्रा न विद्या ग्रहणं न विद्या गृह्णाति किञ्चिन्न यथार्थबोधे निद्रापदार्थग्रहणेतरा स्यात् चिदेव विद्या विलसन्त्यशून्या 12 सत्यश्चिदात्मा विविधाकृतिश्चित् सिध्येत्पृथक्सत्यचितो न भिन्ना भूषाविकाराः किमु सन्ति सत्यं विना सुवर्णं पृथगत्र लोके 13 तद्युष्मदोरस्मदि सम्प्रतिष्ठा तस्मिन् विनष्टेऽस्मदि मूलबोधात् तद्युष्मदस्मन्मतिवर्जितैका स्थितिर्ज्वलन्ती सहजात्मनः स्यात् 14 भूतं भविष्यच्च भवत्स्वकाले तद्वर्तमानस्य विहाय तत्त्वम् हास्या न किं स्याद्गतभाविचर्चा विनैकसङ्ख्यां गणनेव लोके 15 क्व भाति दिक्कालकथा विनाऽस्मान् दिक्काललीलेह वपुर्वयं चेत् न क्वापि भामो न कदापि भामो वयं तु सर्वत्र सदा च भामः 16 देहात्मभावे ज्ञजडौ समाना- वेकस्य देहे हृदि दीप्त आत्मा आक्रम्य देहं च जगच्च पूर्णः परस्य मेयं तनुमात्रमात्मा 17 अज्ञस्य विज्ञस्य च विश्वमस्ति पूर्वस्य दृश्यं जगदेव सत्यम् परस्य दृश्याश्रयभूतमेकं सत्यं प्रपूर्णं प्रविभात्यरूपम् 18 विधेः प्रयत्नस्य च कोऽपि वाद- स्तयोर्द्वयोर्मूलमजानतां स्यात् विधेः प्रयत्नस्य च मूलवस्तु सञ्जानतां नैव विधिर्न यत्नः 19 यदीशितुर्वीक्षणमीक्षितार- मवीक्ष्य तन्मानसिकेक्षणं स्यात् न द्रष्टुरन्यः परमो हि तस्य वीक्षा स्वमूले प्रविलीय निष्ठा 20 आत्मानमीक्षेत परं प्रपश्ये- दित्यागमोक्तेः सुलभो न भावः नात्मैव दृश्यो यदि का कथेशे स्वयं तदन्नीभवनं तदीक्षा 21 धिये प्रकाशं परमो वितीर्य स्वयं धियोऽन्तः प्रविभाति गुप्तः धियं परावर्त्य धियोन्तरेऽत्र संयोजनान्नेश्वरदृष्टिरन्या 22 न वक्ति देहोऽहमिति प्रसुप्तौ न कोऽपि नाभूवमिति प्रवक्ति यत्रोदिते सर्वमुदेति तस्य धियाऽहमः शोधय जन्मदेशम् 23 देहो न जानाति सतो न जन्म देहप्रमाणोऽन्य उदेति मध्ये अहङ्कृतिग्रन्थिविबन्धसूक्ष्म- शरीरचेतोभवजीवनामा 24 रूपोद्भवो रूपततिप्रतिष्ठो रूपाशनो धूतगृहीतरूपः स्वयं विरूपः स्वविचारकाले धावत्यहङ्कारपिशाच एषः 25 भावेऽहमः सर्वमिदं विभाति लयेऽहमो नैव विभाति किञ्चित् तस्मादहंरूपमिदं समस्तं तन्मार्गणं सर्वजयाय मार्गः 26 सत्या स्थितिर्नाहमुदेति यत्र तच्चोदयस्थानगवेषणेन विना न नश्येद्यदि तन्न नश्येत् स्वात्मैक्यरूपा कथमस्तु निष्ठा 27 कूपे यथा गाढजले तथान्त- र्निमज्ज्य बुद्ध्या शितया नितान्तम् प्राणं च वाचं च नियम्य चिन्वन् विन्देन्निजाहङ्कृतिमूलरूपम् 28 मौनेन मज्जन्मनसा स्वमूल- चर्चैव सत्यात्मविचारणं स्यात् एषोऽहमेतन्न मम स्वरूप- मिति प्रमा सत्यविचारणाङ्गम् 29 गवेषणात्प्राप्य हृदन्तरं तत् पतेदहन्ता परिभुग्नशीर्षा अथाहमन्यत्स्फुरति प्रकृष्टं नाहङ्कृतिस्तत्परमेव पूर्णम् 30 अहङ्कृतिं यो लसति ग्रसित्वा किं तस्य कार्यं परिशिष्टमस्ति किञ्चिद्विजानाति स नात्मनोऽन्यत् तस्य स्थितिं भावयितुं क्षमः कः 31 आह स्फुटं तत्त्वमसीति वेद- स्तथाप्यसम्प्राप्य परात्मनिष्ठाम् भूयो विचारो मतिदुर्बलत्वं तत्सर्वदा स्वात्मतया हि भाति 32 न वेद्म्यहं मामुत वेद्म्यहं मा- मिति प्रवादो मनुजस्य हास्यः दृग्दृश्यभेदात् किमयं द्विधात्मा स्वात्मैकतायां हि धियां न भेदाः 33 हृत्प्राप्य सद्धाम निजस्वरूपे स्वभावसिद्धेऽनुपलभ्य निष्ठाम् मायाविलासः सदसत्सरूप- विरूपनानैकमुखप्रवादाः 34 सिद्धस्य वित्तिः सत एव सिद्धिः स्वप्नोपमानाः खलु सिद्धयोऽन्याः स्वप्नः प्रबुद्धस्य कथं नु सत्यः सति स्थितः किं पुनरेति मायाम् 35 सोऽहंविचारो वपुरात्मभावे साहाय्यकारी परमार्गणस्य स्वात्मैक्यसिद्धौ स पुनर्निरर्थो यथा नरत्वप्रमितिर्नरस्य 36 द्वैतं विचारे परमार्थबोधे त्वद्वैतमित्येष न साधुवादः गवेषणात्प्राग्दशमे विनष्टे पश्चाच्च लब्धे दशमत्वमेकम् 37 करोमि कर्मेति नरो विजानन् बाध्यो भवेत्कर्मफलं च भोक्तुम् विचारधूता हृदि कर्तृता चेत् कर्मत्रयं नश्यति सैव मुक्तिः 38 बद्धत्वभावे सति मोक्षचिन्ता बन्धस्तु कस्येति विचारणेन सिद्धे स्वयं स्वात्मनि नित्यमुक्ते क्व बन्धचिन्ता क्व च मोक्षचिन्ता 39 रूपिण्यरूपिण्युभयात्मिका च मुक्तिस्त्रिरूपेति विदो वदन्ति इदं त्रयं या विविनक्त्यहन्धी- स्तस्याः प्रणाशः परमार्थमुक्तिः 40 सद्दर्शनं द्राविडवाङ्निबद्धं महर्षिणा श्रीरमणेन शुद्धम् प्रबन्धमुत्कृष्टममर्त्यवाण्या- मनूद्य वासिष्ठमुनिर्व्यतानीत् 41 सत्तत्त्वसारं सरलं दधाना मुमुक्षुलोकाय मुदं ददाना अमानुषश्रीरमणीयवाणी- मयूखभित्तिर्मुनिवाग् विभाति 42